Валанцёрства як каштоўнасць, якая працуе на нас (варкшоп)
Часам здаецца, што валанцёрства — гэта ўжо звыклая частка грамадскіх ініцыятыў і арганізацый, а нашы ідэі без валанцёрскага пачатку не могуць існаваць. З большага гэта так, але валанцёрскі дух, з якім мы ўваходзім у новую справу, можна ацэньваць і нават манетызаваць.
Што для гэтага трэба? Надаць сваім унутраным і вонкавым валанцёрскім дзеянням каштоўнасць. Навучыцца манетызаваць сваю (а таксама сваіх калег і каляжанак) валанцёрскую працу. Адэкватна гэта прадставіць у лакальнай супольнасці і партнёрам з розных сектараў. Падняць сваю ацэнку і надаць матэрыяльны і духоўны сэнс сваім ідэям.
Пра гэта мы пагаворым падчас варкшопа і больш дэталёва разгледзім наступныя пытанні:
- Як працаваць з валанцёрскімі ініцыятывамі ўнутры арганізацыі?
- Як надаць значэнне сваім менеджарскім дзеянням, якія на самым пачатку функцыянуюць «у фінансавым мінусе»?
- Як не страціць сэнс у сваіх дзеяннях на працягу 1, 2, 10 гадоў працы ў грамадскіх праектах?
- Якія тыповыя памылкі дапушчаюць падчас працы з валанцёр_камі ўнутры і каля вашай ініцыятывы ці арганізацыі?
- Прывядзём прыклады валанцёрскіх праектаў, якія працуюць на сваіх рэалізатараў.
Вядучая варкшопа:
Вольга Хабібулліна — даследчыца міграцыі, экспертка па рэалізацыі міжнародных валанцёрскіх ініцыятыў і праектаў у сферы культуры, моладзі і міграцыі. Як каардынатарка праектаў мае багаты досвед планавання, рэалізацыі і адзнакі валанцёрскіх праектаў у рэгіёне Ўсходняга партнёрства і Рады Еўропы.
Калі: 11 кастрычніка (серада), 19:00−21:00 (па Менску).
Варкшоп пройдзе на расейскай мове.
Для ўдзелу неабходна зарэгістравацца. Спасылка на сустрэчу ў Zoom прыйдзе вам на пошту адразу пасля рэгістрацыі.
Варкшоп праходзіць у рамках анлайн-курса па грамадзянскім удзеле ад ОЕЕС «Звычка цікавіцца».